Baikar Blue logo.png

ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ԱՆԿԱԽՈՒԹԵԱՆ 30-ՐԴ ՏԱՐԵԴԱՐՁԻՆ ՆՈՒԻՐՈՒԱԾ ՁԵՌՆԱՐԿ “ՔԱՐՆԵԿԻ ՀՈԼ”ԻՆ ՄԷՋ

Հոկտեմբեր 13-ին Նիւ Եորքի ՙՔարնեկի հոլ՚ համերգասրահին մէջ ՄԱԿ-ի մօտ Հայաստանի մշտական ներկայացուցչութեան հովանիին ներքոյ տեղի ունեցաւ համերգ` նուիրուած Հայաստանի Հանրապետութեան անկախութեան 30-րդ տարեդարձին: Ամերիկահայ դաշնակահարուհի Կարինէ Պօղոսեանի կատարմամբ հընչեցին Արամ Խաչատըրեանի, Սերկէյ Ռախմանինովի, Ճորճ Կերշուինի եւ այլ աշխարհահըռչակ երգահաններու ստեղծագործութիւնները:

Համերգին յաջորդեց ՀՀ մշտական ներկայացուցչութեան կողմէն կազմակերպուած պաշտօնական ընդունելութիւն, որուն ներկայ էին ՄԱԿ-ի անդամ պետութիւններու մշտական ներկայացուցչութիւններու ղեկավարներ, դիւանագէտներ, ՄԱԿ Քարտուղարութեան պաշտօնեաներ եւ Նիւ Եորքի հայ համայնքի ներկայացուցիչներ:

ՄԱԿ-ի մօտ ՀՀ մշտական ներկայացուցիչ Մհեր Մարգարեան իր ողջոյնի խօսքին մէջ ներկայացուց Հայաստանի բազմադարեան պատմութիւնը եւ մշակութային ժառանգութիւնը եւ հայ ժողովուրդի ներդրումը համաշխարհային քաղաքակրթութեան մէջ: Անդրադառնալով անկախութեան վերականգնումէն ետք հայ ժողովուրդին առջեւ ծառացած բազում մարտահրաւէրներուն` դեսպան Մարգարեան նշեց, որ Հայաստան իրեն սերտօրէն կապուած է Միաւորուած Ազգերու Կազմակերպութեան նպատակներուն ու սկզբունքներուն հետ` ընդգծելով, որ հայկական մշակոյթի, կրօնի եւ լեզուի վրայ խարսխուած ինքնութեան շնորհիւ հայ ժողովուրդը մշտապէս ցոյց տուած է արհաւիրքներէն վերականգնելու եւ նոր կեանք կառուցելու կարողութիւնը: