Baikar Blue logo.png

ԶԻՆԾԱՌԱՅՈՂՆԵՐՈՒ ԱՊԱՀՈՎԱԳՐՈՒԹԵԱՆ ՀԻՄՆԱԴՐԱՄԻ ՆԵՐԿԱՅԱՑՈՒՑԻՉՆԵՐԸ ՄԻՇԻԿԸՆԻ ՄԷՋ

Ուրբաթ, Նոյեմբեր 5, 2021-ի երեկոյեան, Միշիկընի հայ գաղութի ազգայիններ հաւաքուեր էին Ս. Յովհաննէս եկեղեցւոյ Վարդան սրահէն ներս, լսելու ՙԶինծառայողներու Ապահովագրութեան Հիմնադրամ՚ի գործունէութիւնը ներկայացնող միջոցառման: Այս կապակցութեամբ, իրենց Միացեալ Նահանգներու հայաշատ քաղաքներ  շրջապտոյտի ծիրէն ներս, Հիմնադրամի ներկայացուցիչներ Սոնա Պաղտասարեան եւ Նարինէ Գալայճեան կþայցելէին նաեւ Միշիկըն: Այս ձեռնարկի կազմակերպութիւնը յանձն առեր էին Ս. Յովհաննէս Առաքելական եկեղեցին ու Միշիկընի Թէքէեան Մշակութային Միութիւնը:

Ս. Յովհաննէս եկեղեցւոյ բարեջան հովիւ Առէն վարդապետ Ճեպեճեան, իր բարի գալուստի խօսքին մէջ բարձր գնահատեց այս հիմնադրամի աշխատանքը, որ նպատակ կը հետապնդէր նիւթապէս օգնելու անցեալ տարուան Արցախեան պատերազմին, եւ ընդհանրապէս զինեալ բախումներու արդիւնքով զոհուած կամ վիրաւոր զինուորներու ընտանիքներուն:

Ինչպէս յայտնի է միայն այս վերջին պատերազմին աւելի քան չորս հազար հայ զինուոր մահացեր էր եւ հազարաւոր զինուորներ վիրաւորուեր էին: Կարիքները շատ էին իսկ Հայաստանի պետութեան հնարաւորութիւնները անբաւարար: Ահա այստեղ յոյժ գնահատելի գործունէութիւն կը ծաւալէր Զինծառայողներու Ապահովագրութեան Հիմնադրամը: Աւելի քան մէկ ժամ տեւած ներկայացման ու հարց ու պատասխանի ընթացքին, Հիմնադրամի ներկայացուցիչները մանրամասնօրէն բացատրեցին թէ հիմնադրամը ինչ հիմունքներով կþաշխատի եւ ինչպիսի բծախնդրութեամբ կատարւած նուիրատուութիւնները կը յատկացւին նահատակ կամ հերոս հայ վիրաւոր զինուորներու ընտանիքներուն: 

Ներկաները յուզումնախառն զգացումներով հետեւելէ ետք տրուած բացատրութիւններուն, բարձր գնահատեցին հայ զինուորին նիւթապէս թէ բարոյապէս թիկունք կանգնելու այս գործնական նախաձեռնութեան հեղինակներուն նուիրեալ աշխատանքը, խոստանալով կարելի բոլոր միջոցներով օժանդակելու հերոս հայ զինւորներուն ու անոնց ընտանիքներուն: