Baikar Blue logo.png

ՙԱՐՑԱԽԵԱՆ ՀԻՄՆԱԽՆԴԻՐԸ

ԵՒ ԱՐՑԱԽԻ ՀԱՆՐԱՊԵՏՈՒԹԵԱՆ ԱՐՏԱՔԻՆ ՔԱՂԱՔԱԿԱՆՈՒԹԻՒՆԸ՚.

Ստեփանակերտում տեղի է ունեցել յոյժ կարեւոր գրքի շնորհահանդէսը

Յուլիսի 6-ին Արցախի մայրաքաղաք Ստեփանակերտում տեղի է ունեցել Արցախի Արտաքին գործերի նախարարութեան հրատարակած յոյժ կարեւոր աշխատութիւնը` նուիրուած Արցախեան մի շարք հիմնախնդիրների եւ երկրի արտաքին քաղաքականութեանը: ՙԱրցախեան հիմնախնդիրը եւ Արցախի Հանրապետութեան արտաքին քաղաքականութիւնը՚ խորագրով գրքի վրայ, ինչպէս շնորհանդէսի ժամանակ յայտնել է գրքի խմբագիր Դաւիթ Բաբայեանը, արտաքին գործերի նախարարութիւնում աշխատել են աւելի  քան մէկ տարի:

Երեք մասից բաղկացած այս աշխատութեան առաջին մասը պատմական անդրադարձ է, որը լոյս է սփռում մի շարք կարեւոր հանգամանքների վրայ, որտեղ անհերքելի փաստերի տարափի ներքոյ վերահաստատւում է Արցախի հայկականութիւնն ու հայապատկանութիւնը: Պատմական փաստերի լոյսի ներքոյ անդրադարձ է կատարուած մի շարք կարեւոր հասկացութիւնների, որոնք կարեւոր են թէ՛ Արցախի, թէ՛ Ատրպէյճանի մասով, քանի որ բացայայտւում են մի շարք զեղծարարութիւններ, որոնք տասնամեակներ շարունակ ծրագրուել եւ իրականացուել են Ադրբեջանի իշխանութիւնների անմիջական հովանաւորութեամբ:

Երկորդ մասում անդրադարձ է կատարուել Արցախեան հակամարտութեան հիմնախնդրին` պատճառներին, ընթացքին եւ կարգաւորմանն ուղղուած գործընթացի տարբեր մանրամասներին:

Երրորդ մասում անդրադարձ է կատարուել Արցախի Հանրապետութեան արտաքին քաղաքականութեան առանձնայատկութիւններին, մօտեցումներին ու յարակից խնդիրներին: Այդ գըլխում խօսւում է նաեւ այն երկրների մասին, որոնք ճանաչել են Արցախի Հանրապետութիւնը եւ տարբեր քաղաքական բանձեւեր ընդունել` ի պաշտպանութիւն Արցախի եւ արցախահայութեան ինքնորոշման իրաւունքի:

ՙՀակառակորդի կողմից տեղեկատուական պատերազմը շարունակւում է եւ էլ աւելի է ուժեղանալու մօտակայ տարիների ընթացքում: Մենք պէտք է կարողանանք պատշաճ ձեւով պատասխանել նրա փաստարկներին եւ պատրաստ լինել ըստ ամենայնի պահպանել եւ պաշտպանել մեր դիրքերը՚,-գրքի նպատակների մասին խօսելիս` շնորհանդէսի ժամանակ ասել է Դաւիթ Բաբայեանն` ընդգծելով, որ գրքում տեղ գտած նիւթերն ընթերցողին են մատուցւում փաստերի եւ խորհուրդների տեսքով` հնարաւորութիւն ընձեռնելով հիմնաւոր պատկերացում կազմելու խնդրի շուրջ:

Քանի որ խիստ կարեւոր է գրքում շօշափուող թեմաները տարածել նաեւ միջազգային հարթակներում ու հասարակական-քաղաքական շրջանակներում, մօտ ապագայում գիրքը կը թարգմանուի նաեւ օտար լեզուներով` անգլերէն, ֆրանսերէն, գերմաներէն, իսպաներէն եւ ռուսերէն. վերջինի վրայ արդէն իսկ աշխատում են:

Գրքի շնորհանդէսին ներկայ են եղել Արցախի քաղաքական վերնախաւի մի շարք անդամներ նոյնպէս, որոնք կարեւորել են նման աշխատանքի լոյսընծայումն ու հետագայ ճանապարհը` աջակցութիւն յայտնելով միւս աշխատանքների իրականացմանը:

ՙԿարեւոր է տեղեակ լինել նախապատմութեանը, բոլոր առանձնայատկութիւններին, փաստերին ու փաստաթղթերին, պետական դիրքորոշումներին, որպէսզի կարողանանք համակարգուած գործողութիւններ կատարել եւ դիրքորոշումներ յայտնել, ինչպէս նաեւ ամբողջութեան մէջ նոյն լեզուով խօսել ու նոյն եզրոյթաբանութիւնն օգտագործել՚,-ասել է Արցախի պետական նախարար Արտակ Բեգլարեանը:

Նախագահի աշխատակազմի Տեղեկատուութեան գլխաւոր վարչութեան պետ  Վահրամ Պօղոսեանն իր հերթին ընդգծել է, որ այս գիրքը կարեւոր է նաեւ նրանով, որ լոյս է սփռում Արցախեան հակամարտութեան բանակցային գործընթացի վրայ.

ՙՀանրային երկխօսութեան է դրուել, թէ ինչ է քննարկուել արցախեան հակամարտութեան բանակցային գործընթացում, եւ, ընդհանրապէս, կապուած  Մինսկի խմբի գործունէութեան հետ: Ես կարծում եմ, որ այս աշխատութիւնը շատ լաւ հնարաւորութիւն է առաջին հերթին ծանօթանալու մեր ոչ հեռաւոր անցեալին, թէ ինչ է կատարուել, ինչ է քննարկուել , եւ, ըստ այդմ, կատարելու անհրաժեշտ հետեւութիւններ՚,-ասել է Պօղոսեանը:

րքի մասին շահեկան կարծիքներ են յայտնել Արցախի Հանրապետութեան Ազգային ժողովի նախագահ Արթուր Թովմասեանը, նախագահի խորհրդական Լուսինէ Ղարախանեանը, պետական-քաղաքական, հասարակական այլ գործիչներ:

ՙԱրցախեան հիմնախնդիրը եւ Արցախի Հանրապետութեան արտաքին քաղաքականութիւնը՚ գիրքը տպագրուել է բարերարների աջակցութեամբ:

ԼԻԼԻԹ ԼԱԼԱՅԵԱՆ

Երեւան